Konurnar í slömminu

Mig langar að sýna ykkur myndir af konunum í Madoya fátækrahverfinu í útjaðri Nairobi í Kenía. Ég dáist takmarkalaust af þessum konum, sem búa í samfélagi þar sem enginn strúktúr né skipulag er á neinu. Það er ekkert rennandi vatn, ekki klósett, ekkert rafmagn, engin sorphirða, engin bæjarstjórn, bara kaos. 

Þessar frábæru konur komu saman og skipulögðu sjálfboðaliðastarf í hverfinu og stofnuðu skóla. Þær fengu banka til þess að hjálpa til við að fjármagna byggingu almenningsklósetta og vatnstanks. Fólk borgar fáeinar krónur fyrir vatnið og afnot af klósetti og renna þær krónur til samfélagsverkefna. Sjálfboðaverkefnin sem börnin okkar í Little Bees njóta mjög góðs af er t.d. grænmetisræktun í strigapokum og ræktun á hænsnum, kanínum og öndum til manneldis, þannig að nú njóta börnin í Little Bees skólanum hollara og fjölbreyttara fæðis en áður var

Hér má sjá nokkrar myndir af þessu frábæra fólki: http://byflugur.blog.is/album/konurnar_i_little_bees/, http://byflugur.blog.is/album/2010_april_buskapurinn/

Til stuðningsforeldra

Hér koma nýjar myndir og kveðjur frá börnunum ykkar í Little Bees (ýta á litlu myndirnar til að stækka):

 

http://byflugur.blog.is/album/2010_juli/

Dugleg börn frá Íslandi söfnuðu fyrir nýjum glugga í skólahúsnæði í Kenía

Þá er búið að ráðstafa peningunum sem duglegar hnátur frá Íslandi söfnuðu til styrktar börnunum í Little Bees. Þær Katla, Kata og Glóey héldu tombólu en Elín, Rakel Marín, Rakel Sif og Rebekka Líf söfnuðu saman gömlu böngsunum sínum og gengu í hús í Garðabæ og seldu þá. Þess má geta að Katla ásamt ömmu sinni styrkir Agnesi, nemanda Little Bees með mánaðarlegum framlögum, en Elín og fjölskylda hennar styðja við bakið á Marion. Alls söfnuðu þessar frábæru stelpur 20 þúsund krónum sem sendar voru til Little Bees skólans. Fjárhæðin var notuð til þess að kaupa glugga fyrir nýtt skólahúsnæði sem búið er að vera í byggingu undanfarin 3 ár, en hægt gengur að ljúka við. Það er skemmtilegt og gefandi starf að bæta aðbúnað lítilla barna sem ekki voru jafn heppin og við hin, að fæðast í allsnægtunum sem við búum flest við á Íslandi, þrátt fyrir kreppu. Eins og dæmin sanna þá geta jafnvel átta ára börnin okkar gert heilmikið til að bæta líf jafnaldra sinna

Í Kenía á að heita að grunnskólamenntun sé ókeypis, en engu að síður þurfa börnin að koma sér í skólann, oft langar vegalengdir, eiga skólabúninga og bækur. Little Bees skólinn er í fátækrahverfi þar sem þeir allra, allra fátækustu búa, yfirleitt búa börnin hjá einstæðum mæðrum eða ættingjum sem hafa tekið þau að sér. Skólinn er einkaframtak einstaklinga í hverfinu, sem rann til rifja að sjá öll þessi börn sem enga menntun fengu.

Fyrir þá sem vilja styrkja okkur í að ljúka við skólabygginguna, er bankareikningurinn 0137-15-380813, kt. 550109-0850.

Hér má sjá bréf frá tveimur barnanna í Little Bees, til styrktarforeldra sinna á Íslandi, þar sem þau tala um nýja gluggann í skólanum.

http://byflugur.blog.is/album/2010_juli/image/1010993/

http://byflugur.blog.is/users/70/byflugur/img/agnes_til_kotlu.jpg

Duglegar stúlkur

Þessar duglegu stúlkur, þær Katla, Kata og Glóey héldu tombólu til styrktar Little Bees skólanum og söfnuðu 5.000 krónum.

Þess má geta að hún Katla styrkir jafnöldru sína í Little Bees með mánaðarlegum framlögum - en það var jólagjöf til hennar frá Ragnhildi ömmu hennar.

Kærar þakkir stelpur - ég set myndir af vefinn þegar búið er að ráðstafa peningunum frá ykkur. 

Skólastofur minnstu barnanna.

Yngsta deildin í Little Bees hefst við í skúrum sem liggja út frá nýju skólabyggingunni. Þetta er auðvitað hálfgert hreysi, ryðguðu bárujárninu í þakinu var haldið niðri með dekkjum og þakið hélt auðvitað ekki vatni. Einn góður stuðningsaðili Little Bees, hún Magga Stína, öðru nafni Fabúla gaf fjárhæð sem dugði til þess að kaupa nýtt bárujárn og gera við þakið. Hér má sjá myndir af húsinu fyrir viðgerðir og frá vinnu við viðgerðinar.

Nú hafa dugleg börn haldið tómbólu og gengið í hús og selt bangsa og þannig safnað fyrir gluggum í skólastofur yngstu barnanna. Við setjum inn myndir um leið og viðgerðinni er lokið.

Hér eru fleiri myndir af kofunum: http://byflugur.blog.is/album/baby_class/